7578 HÚS Á LEIÐINNI UNDIR HAMARINN.

Þetta er sú sorglega staðreynd sem við húseigendur/íbúðaeigendur í mið Florida búum við.  Ég velti því stundum fyrir mér hvort þetta verði ekki sú staðreynd sem íbúðareigendur á Íslandi mega vænta eftir um það bil tvö ár.  En mér hefur sýnst að fasteignamarkaðurinn á Íslandi sé um það bil tveimur árum á eftir okkar markaði í hegðun.  Þ.e. það tók íslenska markaðinn tveimur árum lengur að byggja upp þriggja ára lager, verðin fóru að lækka tveimur árum á eftir okkur og svo framvegis.  En sem betur fer er smá ljós farið að sjást í endanum á göngunum.  Það er að lagerinn er farinn að minnka hjá okkur, kominn niður í 24.000 eignir og salan komin uppí 1.350 þannig að byrgðir eru nú einungis til 17,8 mánaða.  Sem segir okkur að hús sem eru rétt verðlögð seljast en ekki þau sem eru hátt verðlögð.  Það tekur um það bil 115 daga að selja hús sem er rétt verðlagt í mið Flórída í dag.  Ég er oft spurður að því hvaða eignir eru að seljast og svarið er alltaf það sama: Allar eignir sem eru rétt verðlagðar.  Þeir sem eru að selja í dag eru bankarnir, þeir eiga milli 3.000 og 5.000 eignir sem eru á markaðnum í dag, þessar 7.578 eignir sem eru á leiðinni undir hamarinn eiga flestar eftir að bætast í eignamöppu þeirra og síðan er góður slatti sem er búinn að fara undir hamarinn en ekki komnar á markaðinn.  Ég minni aftur á að ég er bara að tala um mið Flórída þegar ég nefni þessar tölur, bankarnir eru með eignir nokkurn vegin í þessu hlutfalli um öll bandaríkin, kannski aðeins minna sumstaðar.  Þessar bólgnu eignamöppur skapa þeim mikinn lausafjárvanda og þess vegna gera þeir allt sem þeir geta til þess að losna við eignirnar.  Helsta vopnið þeirra, er að selja fyrir lægra verð en aðrir sem eru á markaðnum.  Ég hef hjálpað mörgum að kaup nýleg hús á hálfvirði miðað við verð fyrir tveimur árum.  Sem sagt ef þú ert að hugsa um að kaup þá er þetta þinn draumatími.

Kíkjum nú aðeins á tölurnar sem ég nefni í fyrirsögninni og byrjum á Lake sýslunni (Clermont og Mount Dora eru í Lake County), þar eru 736 eignir á leiðinni undir hamarinn eða ein af hverjum 189 eignum. Seminole sýslan (Sanford/Orlando International Airport er þar), 895 eignir á leiðinni undir hamarinn eða ein af hverjum 192 eignum.  Osceola sýslan (Kissimmee og St. Cloud þekktustu bæir), er með 1703 eignir á leiðinni undir hamarinn eða eina af hverri 69 eignum.  Þetta er hæsta hlutfallið á svæðinu.  Síðan en ekki síst er Orange sýslan (Orlando og Disney frægust) þar eru 4244 eignir á leiðinni undir hamarinn eða ein af hverri 106 eignum.  Orange sýslan er þéttbýlust og þar er mestur fjöldinn.  Eins og ég nefndi að ofan þá eru þetta eignir sem eru á leiðinni undir hamarinn og ekki taldar með ennþá í eignamöppu bankanna.  Flestar af þessum eignum eru nú boðnar sem skortsala með miklum afslætti.

Tölurnar að ofan fann ég á vef fasteignasala í mið Flórída og með vafri um netið.