AÐ STANDAST SKOÐUN.

 

Ég frétti af því að nokkrir höfðingjar í Ventura í Orlandó hefðu átt miklar umræður um skoðun eigna og hvaða gildi eða tilgang þessar skoðanir hafa. Ég er ekki viss um að þessir snillingar séu alveg á réttri leið svo ég ætla að skrá hér upplýsingar um algengustu eignaskoðanir og tilgang þeirra.

 

Söluskoðun eigna:

Söluskoðun eigna er algengasta skoðun sem gerð er, hún er gerð fyrir kaupanda eignar til þess að fræðast um ástand eignar sem hann er að kaupa. Yfirleitt er ákvæði í kaupsamning um að seljandi geri við kerfisgalla í eignum eða að kaupandi geti hætt við kaupin finnist kerfisgalli í eigninni.

Við mælum með að kaupendur allra eigna láti skoða eignir við kaup með það að tilgangi að kynnast eigninni og ástandi kerfa eignarinnar. Við söluskoðun fer fram heildarskoðun á eigninni þ.e. ástands skoðun, ásamt því að kanna hvernig frárennslismálum í kringum eignina er háttað. Hafa skal í huga að þessi skoðun er sjónskoðun sem framkvæmd er án þess að opna veggi. Ég mæli alltaf með því að kaupandi eignarinnar fylgi skoðunarmanninum eftir og leiti eftir upplýsingum um kerfi hússins og viðhald þeirra hjá skoðunarmanninum. Nú ætla ég að lýsa því sem skoðunarmaðurinn gerir eins og ég væri að fylgja honum. Yfirleitt byrjar skoðunarmaður á því að labba hringinn í kringum eignina, á þessari hringferð athugar hann hvar vatnsinntakið er og ástand þess, síðan skoðar hann rafmagnsinntakið frágang þess og tengingar. Næst er að athuga alla glugga, hurðir, veggi og frárennsli. Þegar hann er búinn á jörðinni fer hann uppá þak þar sem athugar ástand og aldur á þakskífum, þakrennum, þakgluggum, loftræsti ventlum og skorsteini. Innanhúss skoðar hann ástand og aldur loftræstikerfisins, meðal annars hvort stokkarnir leka og hvort hitastigsmunur inn og út úr kerfinu er eðlilegur. Þá athugar hann hvaða gerð af pípulögnum er í eigninni og ástand þeirra, ásamt búnaði sem tengdur er við lagnirnar. Einnig athugar skoðunarmaður hvaða tegund af rafkerfi er í eigninni sem dæmi, eru koparvírar eða álvírar í húsinu, eru viðbætur við rafkerfið sem húseigandi hefur sett upp, er allt rétt tengt í töfluskápnum, virka allir rofar og tenglar. Ef heimilistæki fylgja með í sölunni þá þarf að prufukeyra þau. Ef sundlaug fylgir þarf að prufukeyra hana. Síðan þarf að athuga hvort allir gluggar opnist og lokist á réttan hátt ásamt því að kanna hvort hurðir séu rétt settar í og læsist. Þetta er ekki tæmandi upptalning en gefur ykkur hugmynd um hvað er skoðað. Hafa ber í huga að ekkert hús er fullkomið og að það er hægt að gera við hvað sem er, spurningin er bara hvað kostar það? Kostnaður við kaupskoðun ræðst af stærð eignarinnar og getur verið frá um það bil $190 til $600.

 

Vindálagsskoðun:

Eigendur fasteigna sem eru með tryggingu sem tryggir fyrir vindskemmdum geta samkvæmt lögum látið skoða hjá sér ástand og frágang á þaki og jafnvel fengið lækkun á iðgjöldum með því að skila skoðunarskýrslu til tryggingarfélags. Þó er það skondið að sjá hvernig sumir skoðunarmenn staðhæfa að: Ef þú er ekki búinn að láta gera vindálagsskoðun á húsinu þínu, þá ert þú líklega að greiða of hátt iðgjald fyrir vindhluta tryggingar hússins. Ég hef haft samband við nokkra tryggingafulltrúa og spurst til um þessa fullyrðingu, þeir eru allir sammála að þessi fullyrðing er ekki rétt eins og skoðunarmenn setja hana fram. Aftur á móti þá má segja að ef húsið byggt 1995 eða er eldra og að þakið sé minna en 10 ára gamalt, þá er möguleiki á að fá lækkun iðgjalda. Sé þakið eldra en 10 ára og frágangur á sperrum lélegur, þá er möguleiki á að iðgjaldið hækki. Þegar vindálagskoðun er framkvæmd þá er litið á atriði eins og: lögun á þaki, gerð veggja, aldur flísa á þaki, frágang á gluggum og hurðum, aldur hússins ásamt staðsetningu hússins á landinu og hæð lands frá sjávarmáli. Oft er möguleiki að gera minniháttar lagfæringar á eignum og bæta með því styrkleika þaksins mikið. Eðlilegt verð fyrir vindálagsskoðun er um $75.

 

Fjögurra punkta skoðun eigna:

Fjögurra punkta skoðun eigna hefur þann eina tilgang að sýna tryggingarfélagi að það sé í lagi að tryggja eignina. Yfirleitt er um eldri eignir að ræða og að eigendur húsanna eru að óska eftir því að eignin verði tryggð annar staðar heldur en hjá Citizen tryggingafélaginu (Citizen er tryggingafélag í eigu fylkisins og er talið tryggingafélag af síðustu sort, ásamt því að vera rándýrt. Citizen má ekki neita að tryggja fasteign.). Skoðunin er framkvæmd til þess að eigandi geti framvísað vottorði um að: þakið á húsinu er í lagi, rafkerfið er löglegt, kælikerfið gott og pípulagnir góðar. Þessi skoðun tekur á endingu og aldri kerfanna ásamt því að skýra frá hvaða efni er í kerfunum. Eru raflagnirnar úr áli, sem margir vilja ekki tryggja eða hækkar iðgjaldið verulega. Eru pípulagnir úr Polybutylene plasti sem einungið um það bil 25ta hvert tryggingafélag tryggir og þá fyrir háar upphæðir, en undanskilur leka í tryggingunni. Einnig er skoðað hver framleiðir búnaðinn og hvort það sjáist merki um að búnaðurinn sé að verða úr sér genginn.

Fjögurra punkta skoðun kemur ekki í staðin fyrir kaupskoðun eigna þar sem hún tekur ekki á fjölda atriða sem skipta máli við ákvörðun um kaup. Algengt verð á fjögurra punkta skoðun er um $95.

 

Þak skoðun:

Það kemur fyrir að tryggingafélög fari fram á að þök húsa séu skoðuð af þar til bærum skoðunarmanni eða þakverktaka. Þetta gera þau vegna þess að þau telja að þakið sé orðið gamalt og gæti gefið sig. Skoðunin fer þannig fram að skoðunarmaður byrjar á því að leita að byggingarheimild fyrir þakinu, síðan fer hann uppá þak og skoðar ástand á þakefninu, tekur myndir af þakinu og áætlar mögulegan líftíma þaksins. Þess vegna er mikilvægt fyrir húseigendur að halda vel utanum öll gögn sem sýna hvað var gert og hvenær það var gert, varðandi viðhald fasteignar. Algengt verð á þessari skoðun er $75.

 

Aðrar skoðanir:

Ekki ætla ég hér að fara að telja upp allar skoðanir sem hægt er að láta framkvæma í Flórída, en læt nægja að telja upp þær helstu.

Radon Gas: Er geislavirkt náttúrulegt gas sem mögulegt er að finna í Flórída.

Byggingaleifi: Það kemur fyrir að seljendur eigna hafi gert endurbætur á húsunum en verktökunum sem framkvæmdu viðgerðina láðist að láta fara fram lokaúttekt hjá bænum og loka verkinu.

Mygluskoðun: Mygla er hluti af náttúrunni og er mögulegt að hún berist inní hús, hún lifir góðu lífi í raka.

Flóðaskoðun: Hægt er að láta mæla hvort eignin er á flóðasvæði eða líklegt að eignin flæði.

Orkuskoðun: Hægt er að láta mæla og skoða hvort orkunotkun hússins er eðlileg.

Blýinnihald málningar: Fyrir árið 1978 var algengt að málning innihéldi blý.

Hverfafélagsskoðun: Það er nauðsynlegt að vita hvort hverfafélagið sé fjárhagslega og lagalega í góðu ástandi.

Skattaskoðun: Kaupendur fasteigna ættu alltaf að kanna hversu háa skatta þeir þurfa að greiða miðað við kaupverð eignarinnar.

 

Í viðbót við þessar skoðanir þá framkvæmir Title Company (lögmannsstofa) veðbanda skoðun eignarinnar og kannar hversu mikið er áhvílandi á eigninni, þessi skoðun er tryggð að upphæð kaupsamnings (Title Insurance). Það er von mín að þessi umfjöllun um skoðanir fasteigna skýri málin aðeins fyrir ykkur. Ef þið eruð í einhverjum vafa eða þurfið nánari upplýsingar um einhver atriði, þá eruð þið velkomin að hafa samband við okkur og við munum gera það sem við getum til að aðstoða.

Það er ekki spurning hvort, heldur hvenær?

Þar sem margir Íslendingar eiga fasteignir í Bandaríkjum Norður Ameríku, þá þykir mér rétt að setja hér inn grein sem birt er í Fréttablaði Floridahus.is.

Það þótti nú heldur betur flott að hafa polybutylene pípulagnir með kranaskáp í húsinu sínu í upphafi 8unda og 9unda áratugarins. Þetta leit út fyrir að vera kerfi sem væri á undan sinni samtíð og gerði allt miklu einfaldara.

Polybutylene pípulagnaefnið var framleitt af Shell á árunum 1975 til 1995 er framleiðslu var hætt vegna vandamála sem hafa komið upp. Staðan í dag er sú að það er ekki spurning hvort lagnirnar munu gefa sig heldur er spurningin hvenær? Í dag neita flest öll tryggingarfélög að tryggja hús með Polybutylene lagnarefninu. Þau fáu sem enn tryggja eignir með Polybutylene lagnarefninu rukka milli $1,000 og $2,000 meira á ári fyrir tryggingu eignarinnar.

Í upphafi voru það tengin sem brugðust og fóru að leka. Að Amerískum sið þá sáu lögmenn tækifæri og var Shell stefnt í hóp lögsókn sem vannst og fengu eigendur húsa með polybutylene lögnum greiddar bætur til þess að skipta um öll tengi, þetta gerðist um miðjan 8unda áratugarins. Nú er komið í ljós að klórinn sem er í drykkjarvatninu hér tærir lagnirnar og veldur leka. Yfirleitt þegar lögnin gefur sig þá kemur stórt gat sem veldur miklu flóði. 

Eigendur nokkurra eigna í Ventura eru búnir að skipta um lagnir í húsunum sínum, það hefur kostað þá milli $3,000 og $6,000. Það er misjafnt hversu mikið rask er af þessari aðgerð, inni í verði hjá sumum hefur verið að ganga frá götum sem gerð hafa verið á veggjum og lofti á eftir og jafnvel nýr vatnshitari. Ég ráðlegg þeim sem eru með polybutylene lagnir að skrúfa fyrir vatnið á meðan þeir eru ekki í húsinu og munið að slá út örygginu fyrir vatnhitarann líka.

Með því að nota leitaroðið „Polybutylene“ getið þið fengið nánari upplýsingar um lagnaefnið og vandamálin sem því fylgja á netinu.

Íslendingar eru velkomnir til Flórída.

Eins og við töluðum í síðasta fréttabréfi, þá setti þingið í Flórída lög sem tóku gildi fyrsta

janúar á þessu ári þess efnis að allir sem vildu aka um í Flórída yrðu að vera með ökuskýrteini á ensku. Þessi lög voru þvert á alþjóðasamninga sem alríkið hafði gert, löggæslan í Flórída hefur ekki framfylgt þessum lögum. Nú nýverið voru sett ný lög sem taka gildi um miðjan apríl sem fella niður þessi lög. Með öðrum orðum þið eruð velkomin til Flórída, þið megið aka um götur og vegi hérna og nota ykkar Íslensku ökuskýrteini. Það virðist vera að það séu kindugar löggjafasamkundur á fleiri stöðum en í henni Reykjavík.

Til að gerast áskrifandi af mánaðalegu fréttabréfi The Viking Team, Realty fylgið tenglinum. http://floridahus.is/index.php/component/acymailing/sub/display/formid-96/tmpl-component

Senda lyklana til bankans og lenda í fangelsi.

Eftirlitsstofnun Húsnæðis Fjármögnunar sjóðs Banadríkja Norður Ameríku

leitar nú með logandi ljósi að fólki sem yfirgaf hús sín án þess að greiða af

veðlánunum sínum eða leita samstarfs við lánastofnun við úrlausn vandans. Með

því að yfirgefa eignirnar og senda inn lyklana, neyddu þeir lánastofnunina til

þess að ganga að eigninni með nauðungarsölu. Þetta gerðu margir án þess að það

væri um raunverulegt harðræði að ræða og þrátt fyrir það að þeir gætu greitt af

láninu.

 

Það er talið að um 20% af öllum nauðungarsölum í BNA sé vegna fólks sem gat

greitt af lánunum sínum. Eftirlitsstofnunin áætlar að tjónið sem þetta fólk er

búið að valda Fannie Mae og Freddi Mac sé um 1 billjón dollara.

 

Eftirlitsstofnunin er að vinna í því með Fannie Mae og Freddi Mac að finna

leiðir til þess að koma böndum á þetta fólk.

 

„Þessar skuldir gufa ekki upp og það þarf að greiða þær" er haft eftir

ónefndum starfsmanni fjármálaráðuneytis BNA í Chicago Tribune, „það skiptir ekki

máli hvort skuldirnar eru á greiðslu skýrslu eða ekki".

 

Eftirlitsstofnunin er með enn sterkari viðvörun til þeirra sem sækja um ný

lán og láta þess ekki getið í lánsumsókninni að þeir gengu í burtu frá láni.

Þetta göngufólk er sekt um lánasvik og mun verða lögsótt.

 

„Við munum krefjast endurgreiðslu lánanna" er haft eftir Heather Wolfe,

aðstoðarforstjóra rannsóknadeildar eftirlitsstofnunarinnar.

 

Ástæðan fyrir því að ég rita þetta er að það er rætt um það á Íslandi hvort

ekki eigi að leyfa fólki að senda inn lyklana eins og í BNA. Í fyrsta lagi það

er ekki heimilt að senda inn lyklana í BNA. Í öðru lagi það er talið öruggasta

leiðin til þess að missa stjórn á ástandinu og í þriðja lagi það hefur sýnt sig

að um 20% þeirra sem senda inn lykla eða labba frá fasteign, geta greitt lánin.

Meginhlutinn af 20% eru fjárfestar sem hefðu ekki gefið bankanum gróðann ef

þeir væru að græða á fjárfestingunni.

 

Það sem margir skilja ekki er að flest lán í BNA eru í eigu alríkisins og

það eru skattgreiðendur sem eru að greiða fyrir þessa hegðun fjárfestanna.

Þannig að þeir sem eru að leigja út eru að maka krókinn?

Ég velti því fyrir mér, hvað vakir fyrir blaðamanni sem spyr á þennan hátt? Er hann að búa til frétt?  Er hann að reyna að hafa áhrif á frétt?  Er hann sjáfskipaður neytendafrömuður?  Eða veit hann ekki hvað hann er að fjalla um?

Ég er Fasteignasali í Flórída og vinn mikið með fjárfestum sem kaupa og leigja út eignir.  Alltaf áður en þeir kaupa þá reiknum við út hver mögulegur hagnaður (að maka krókinn) gæti orðið af fjárfestingunni.  Það er viðmiðunarregla hjá flest öllum fjárfestum að fjárfestingin skili 8-12% hagnaði, svo eru nokkur dæmi um að mér hafi tekist að finna eignir sem skila meiri arði.  Þegar það tekst þá er mér klappað á bakið og mér er sagt að mér hafi tekist vel til. 

Menn verða að skilja það að eiga og leigja út fasteign er eins og hver annar atvinnuvegur, hann þarf að skila arði.  Fjárfestarnir (atvinnurekendur) þurfa að fá ávöxtun (tekjur) af þeim fjármunum sem þeir leggja í eignina (fyrirtækið) ef það gerist ekki, þá fara þeir bara eitthvað annað með fjármagnið sitt.

Síðan verða menn líka að skilja að leigusala er áhættusöm, því miður er stór hluti leigjanda sem skilur ekki viðhaldsþörf og kann ekki umgengni við fasteignir.  Svo því miður eru nokkrir sem svíkjast undan því að borga leiguna og sitja sem fastast.  Ég gæti haldið lengi svona áfram og talið upp áhættuna við að leigja út eignir en mun ekki gera það.

Spurningin sem blaðamaðurinn að mínu mati ætti að velta fyrir sér er frekar: Hvað er það í kerfinu sem veldur því að húsaleiga á Íslandi þarf að vera meira en tvöfalt hærri en hér í Flórída.  Er það kannski kostnaðurinn við fjármagnið og vísitölutrygging lána?  Er það kannski réttarkerfið það tekur of langan tíma að koma út leigjanda sem ekki greiðir?  Er það kannski skattaumhverfið?  Ég hef það á tilfinningunni að leigusalarnir séu ekki að maka krókinn.

Leigan hækkar og hækkar

Erfðaréttur á fasteignum í Flórída.

Oft og mörgu sinnum hef ég verið spurður um erfðamál í Flórída. Það eru margir sem hafa skoðun á þessum málum og það virðist sem annar hver maður sem ræðir þessi mál, sé búinn að fá lögfræðiálit hjá vinum eða kunnugum.  Það algengasta og vitlausasta sem ég hef heyrt er: Þegar útlendingur fellur frá í Flórída þá erfir Flórída Fylki búið.  Svo númer tvö: Það verður að stofna félag (Trust) um eignina til þess að Fylkið hirði hana ekki.  

Erfðarétturinn í Flórída er að mörgu leiti svipaður og á Íslandi nema hvað allt yfirbragð er meira, eins og í Breskum rétti, þunglamalegt.  Þegar ég sá grein um erfðarétt á fasteignum í Orlando Realtor blaði Fasteignasala í Orlando, óskaði ég eftir leyfi til þess að endursegja þessa grein.  Það var góðfúslega leyft og Þakka ég Lisa McDuffie fyrir heimildina.  Eftirfarandi er endursögnin með tenglum í upprunalegu greinina og viðkomandi lagabálk.

Hvaða áhrif hefur erfðaréttur á fasteignir?

Erfðaréttur er þegar rétturinn hefur eftirlit með því að greina og safna saman eignum og skuldum látins einstaklings.  Greiða skatta, skuldir og kostnað við uppgjör bús einstaklingsins.  Síðan hefur rétturinn eftirlit með skiptum  eignanna milli erfingja.  Kaflar 731 til og með kafla 735 í lögum Flórída fylkis fjalla um erfðarétt og skipti á dánarbúum.

Hvað fjallar erfðaréttur um sem snýr að fasteignum?

Fasteignir sem eru í eigu einstaklings þegar hann fellur frá og skortir greinilegar leiðbeiningar um hvernig á að fara með eignirnar eftir fráfall einstaklingsins.  Sem dæmi eignin er í eigu félags (Trust), veðlánið eða aðrar skyldur greiðast upp við andlát eða eignin var sameign fleiri aðila.

Hvað ef eignin er skráð sem sameign á afsali?

Fasteign í sameign hjóna er skilgreind sem ábúðaréttur til eilífðar ("tenancy by the entirety") í lögunum.  Ábúðaréttur til eilífðar mynda samnýtingar rétt á eigninni.  Þar sem eftirlifandi maki eignast allan rétt til fasteignarinnar við andlát þess sem fer fyrr.

Hinsvegar, ef fasteignin er í eigu fólks í sambúð, vina eða viðskiptafélaga, þá getur smáorðið "og" ("and") milli nafna eigenda á afsalinu skapað sameign ("tenancy in common") í staðinn fyrir sameiginlegan rétt með erfðarétti ("joint tenancy with rights of survivorship"). Þar af leiðandi mun dánarbú hins látna eiga fasteignina sameiginlega með þeim sem eftir lifir og er getið á afsalinu.

Fljótfærnislega útbúin afsöl sem eru útbúin án nokkurrar hugsunar um hvort eignin eigi að vera sameign eða sameign með ábúðarrétti til eilífðar er uppspretta mikillar og óvæntrar vinnu fyrir lögmenn.  Það kemur oft fyrir að barn (eða barn og maki barnsins) aldraðra foreldra hlaupa undir bagga með foreldrunum og styðja þau fjárhagslega með því að greiða af veðláninu fyrir þau eða greiða það upp.  Gera við eignina og viðhalda eigninni einungis til að komast að því að við andlát foreldrisins að afsalið var ekki unnið á réttan hátt og að eignin er sameign allra systkinanna (þarna gefum við okkur að barnið sem hjálpaði á systkini).  Nú getur búið veðsett eða selt eignina eftir skiptin án þess að barnið sem hjálpað fái nokkuð endurgreitt.  Barnið sem hélt að það ætti eignina er mjög óánægt og vonsvikið.

Hvað með fasteign sem er í eigu fráskyldra hjóna?

Við skilnað slitnar keðjan sameign til eilífðar, sem eignin var meðan eigendurnir voru hjón.  Ef annar aðilinn í fyrrverandi sambúð fellur frá þá verður eignin að sameign eftirlifandi eiganda með dánarbúi fyrrverandi eiganda, sem oft á tíðum inniheldur nýjan maka og ný börn.  Slitin á sameign til eilífðar keðjunni heimilar einnig að það sé tekið fjárnám í eigninni vegna vanskila eða dóma, sem þýðir að skuldir annars aðilans verða að greiðast upp ef eignin er seld.  Þess vegna mæli ég með því að fólk skilji ekki meðan það á fasteign sameiginlega, hvort sem það er íbúðarhús (íbúð) eða atvinnueign.

Í hvert skipti sem eignabreyting og eða nafnabreyting verður á fasteign er skinsamlegt að hafa samband við lögmann með reynslu á fasteignasviði, sem er vanur að eiga við erfðarétt og búskipti.

 

Þessi grein er endursögn á greininni "What is probate as it  relates to real property?" eftir Grace Anne Glavin, Lögmann og birtist í Orlando Realtor March/April 2011 heftinu.

Grace Anne Glavin, Esq., er eigandi Law Offices of Grace Anne Glavin, P.A. og Morgan Title Company. Það er hægt að hafa samband við hana með e-mail [e-mail].  Hún er einnig í sjórn og stofnandi Central Florida Real Estate Council.  CFREC sér um að rita greinar um lögfræðileg málefni fyrir blað félags fasteignasala í Orlando(ORRA)  með það að markmiði að auka skilning fasteignasala á lögum og ýmsum áhugaverðum málum.  Þar sem engin tvö mál eru eins er ekki ráðlegt að treysta alfarið á þessa eða aðrar lögfræðigreinar heldur skal hafa samband við lögmann. Nánari upplýsingar er að finna á vefnum http://www.centralflrec.com/.

Hvernig frétt getur verið 100% rétt og á sama tíma 100% röng.

Fasteignasala er og verður alltaf staðbundin, sem dæmi 150 fm. hús myndi kosta rúmlega tvöfalt meira á góðum stað í New York heldur en í Flórída.  Vegna þess hversu oft ég hef þurft að útskýra fyrir viðskiptavinum mínum hversu vitlausar þessar fréttir eru þegar þeir ætla að staðfæra þær yfir á markaðinn í mið Flórída, þá ætla ég að leifa mér að endursegja fréttina með tölunum fyrir mið Flórída.

Byrjum á fyrirsögninni. "Litlar breytingar á fasteignasölu vestanhafs."  Okkar fyrir sögn gæti hljómað: Miðjuverð fasteigna ekki verið lægra síðan í Maí 1998, en það fór í 99,900 Bandaríkjadali í Ágúst.

"Alls voru seldar 288 þúsund nýjar fasteignir í síðasta mánuði."  Þar sem ég hef ekki tölur un nýbyggingar myndi ég segja: Alls seldust 2.429 íbúðareiningar í síðasta mánuði.

"Er það svipaður fjöldi og mánuðinn á undan en 29% minni sala en fyrir ári síðan."  Sem er 3 eignum fleiri en meðaltal síðustu 12 mánaða.

Um er að ræða sölu á íbúðarhúsnæði og hefur hún einungis einu sinni verið minni.  (Ég held að hér eigi að standa nýbyggingum.)  Byggingaraðilar í mið Flórída eru að taka við sér og farnir að byggja aftur.

"Segja sérfræðingar að þetta eigi ekki að koma neinum á óvart enda hafi fasteignasala verið mjög lítil í allt sumar í Bandaríkjunum."  Sérfræðingar í mið Flórída telja að fasteignasal miðað við eftirspurn sé að ná jafnvægi, aftur á móti er mögulegt að miðjuverð fasteigna falli neðar.

"Meðalverð fasteignar er 248,800 Bandaríkjadalir, 28,7 miljónir króna."  Meðalverð fasteignar er 140,897 Bandaríkjadalir, 16,252,989 krónur.

Eins og sést að ofan þá er erfitt að átta sig á svona fréttum sem alhæfa um markaðinn, í þessari frétt kemur ekki nægilega vel fram að einungis er verið að fjalla um nýbyggingar.  Þar er ekki fjallað um þá staðreynd að það seldust 4,1 milljón íbúðareiningar í Bandaríkjunum í síðasta mánuði smellið hér.

Þessi grein segir ekkert um að hér í Bandaríkjunum er verið að setja nýtt met, þar sem það er áætlað að yfir 1 milljón íbúðareininga verði seldar nauðungarsölu í ár, það segir ekkert um að það sé talið að eignarmappa bankana innihaldi um 2,4 miljónir íbúðareininga.  Hún segir ekkert um það að það sé talið að verð muni ekki hækka fyrr en í fyrst lagi 2012 og fram að þeim tíma þá gæti verð lækkað.

Kannski að ég taki þessi atriði fyrir og riti grein eða greinar um ástandið á markaðnum eins og það snýr að okkur sem vinnum við þetta hérna úti.

Litlar breytingar í fasteignasölu vestanhafs

Er Englafæði svarið sem Íslenskar fjölskyldur bíða eftir?

Við lestur fjölmiðla á Íslandi er áberandi hversu slæm staða margra fjölskyldna er, sú staðreynd að ásókn í aðstoð frá Mæðrastyrks nefnd eykst um 50% milli ára og greinar og blogg um aðgerðaleysi stjórnvalda til hjálpar heimilunum í landi er hvatinn að þessu bloggi mínu.Hér í Bandaríkjum Norður Ameríku hafa margar Kirkjur og trúfélög sameinast til aðstoðar heimilunum með því að bjóða þeim til kaups mat á kostnaðarverði.  Þetta hófst í  Monroe sýslu árið 1994 rétt fyrir utan Atlanta í Georgia.  Verksmiðjum í sýslunni var lokað og fólkið missti atvinnuna, Prestarnir Joe og Linda Wingo fundu mikið til með söfnuði sínum sem ekki hafði til hnífs né skeiðar og lifði aðallega á matarkortum frá Alríkinu, þau ákváðu að reyna að hjálpa fólkinu til þess að drýgja þessa peninga.  Þess vegna stofnuðu þau Angel Food Ministries og hófu dreifingu á matvælum til 34 fjölskyldna, fljótlega óskuðu aðrar kirkjur eftir samstarfi og nú dreifir Angel Food Ministries mánaðarlega matvælum til 500,000 fjölskyldna í 44 fylkjum í Bandaríkjum Norður Ameríku.Þessi starfsemi er rekin án hagnaðar og greiða viðskiptavinirnir einungis kostnaðarverð vörunnar, öll dreifing fer fram einu sinni í mánuði í safnaðarheimilum og er unnin í sjálfboðavinnu.  Með þessu fyrirkomulagi fá fjölskyldurnar matvöruna næstum því á heildsölu- eða verksmiðjuverði og drýgja þar með matarpeninga mikið.

Smellið hér til að komast á heimasíðu Angel Food Ministries.

Smellið hér til að skoða matseðil mánaðarins.

Gegn hverjum er glæpurinn?

Ég held að allir geti verið sammála um að það er glæpur að rýra veð eigna með því að fjarlæga hluta veðsins, komi til nauðungarsölu.  En hafið þið velt því fyrir ykkur hverjir eru fórnarlömbin?  Flestir sem ég tala við segja mér að það sé bankinn sem verður fyrir tjóninu og nokkrir bæta við að það sé gott á þá.

Ekki get ég sagt að ég sé sammála þessu góða fólki.  Í fyrst lagi þá eru bankarnir í eigu þjóðarinnar í dag og í öðru lagi þá er þetta einnig atlaga að skattagrunni sveitafélaganna og þjóðarinnar í heild.  Til þess að útskýra mál mitt ætla ég að taka mjög gott dæmi frá Orlando í Flórída.  Hér er hverfi sem var að mestu leiti byggt á árunum 2005 til 2008, er reyndar enn í byggingu en gengur hægt.  Margir að kaupendum í þessu hverfi fengu lygalán í gegnum Countrywide Mortgage (nú í eigu Bank of America), þetta var fólk sem taldi sig vera að gera rétt á þeim tíma en í dag eru um eða yfir 50% af þessum lánum í nauðungarsölu eða skort sölu.  Í hverfinu eru 573 hús og hafa milli 15 og 20 af þessum húseigendum valið að taka með sér innréttingar, kælikerfin, sundlaugadælurnar, hurðir og annan búnað.  Síðan eftir að bankarnir eignast húsin eru þau seld í því ásandi sem þau eru þar sem þau eru (AS-IS) og seljast fyrir allt að $100,000 lægra verði heldur en sambærileg hús í hverfinu.  Síðan þegar aðrir kaupendur koma í hverfið og líta á hvað hefur selst og á hvaða verði þá sjá þeir þessi lágu verð og vilja ekki greiða hærra fyrir húsin sem þeir eru að kaupa.  Þetta hefur valdið um það bil $50,000 verðlækkun á húsum í hverfinu.  Sem þýðir að $50,000 lækkun á hús sinnum 573 hús gerir $28,650,000 lækkun á verðmæti hverfisins og þar af leiðandi skattagrunni sveitafélagsins.  Ég er hræddur um að ef Íslendingar ætla að fara að taka upp þennan ósið eftir Ameríkönum og lækka skattagrunn sveitafélaga um IKR 3,584,115,000 á hver 573 hús, þá verði erfitt fyrir sveitafélögin að veita grunnþjónustu við íbúana.  Mitt álit er að það verður að stoppa þennan ósóma áður en hann verður að faraldri. 

Við uppreikning á verði miðaði ég við gengi USD 125.10

Kærur vegna eignaspjalla

Hvað er þá lýðræði, Steingrímur?

Í greininni er haft eftir Steingrími „Þetta var ekki mjög lýðræðisleg ákvörðun, sem hann tók á síðustu klukkustundunum í embætti,"  Ég sem allan þennan tíma hef haldið að Alþingi hafi ákveðið að Sjávarútvegsráðherra skuli gefa út kvóta eftir ábendingu frá vísindamönnunum á Hafró og taldi ákvörðun Alþingis lýðræðislega.  Ef þetta er ekki lýðræði hvað er þá lýðræði?

Vilja stöðva hvalveiðar á næsta ári